下晝中段國企股忽然出現大沽壓，拖低大市，恒指最低跌到10035，但好快又上番10096埋單。似乎，暫時一萬點大關有支持。
個市跌，啲Put輪又領風騷，但𠵱家先至追揸Put輪，唔化算，下便水位恐怕有限。不如吼恒指再回到接近一萬齊頭之時，平平哋揸啲恒指Call輪，對象係9749同9785，兩隻輪槓桿率都唔細，要有心理準備贏輸都好大，一日之間上落兩成，閒過立秋。
電盈（008）配股停牌，復牌之後肯定難逃一跌，啲股東仔口中唸唸有詞。中移動（941）與聯通（762），分別唔見2.8%同3.4%，升咗咁多，調整吓好應該。中移動低見20.45元彈番上20.95元收市，未來仍有機會下試20元邊邊，然後止跌反彈，見低位可以諗吓兜啲Call輪，對像係9754同9861。9754喺9月到期，輪價45.5仙，溢價0.5%，槓桿率4.6倍；9861年底夠鐘，輪價37仙，溢價3.6%，槓桿率5.7倍。兩隻輪槓桿率唔算特別大，所以波幅亦唔會令人心臟大跳動。
是日跌市中，太A（019）逆流升20仙，收35.80元。但隻熱門Call輪9660則跌2仙，收39仙，明年1月夠鐘，溢價5.5%，槓桿率9.2倍，開始值得考慮買番些少。
中信泰富（267）收15元，只係唔見5仙。Call輪9646由12.3仙退到11.8仙，見10仙邊邊，細注買入，博反彈沽出。
章盛