葉劉同阿松雙雙辭職，政局不穩，股市亦受震盪，恒指下跌110點。市場氣氛突然轉淡，跌價股（不計認股證）足足有500隻，國企股成個倒轉V頂回落，走晒樣。
大行同基金全面睇好國企，令國企近期升勢火上加油，短短個多月，升幅由40%至60%者比比皆是，升得急，回吐壓力亦大，不過，收市後同芬佬傾偈，講到國企個勢，佢哋話一股都冇沽過，中長線睇好嘅立場亦冇改變。國企噚日單日轉向插水式下跌，相信又係另一次震倉，大戶鬆一鬆手而已，到低位又會再買過。
國企表現咁強，係有實際業績支持，好似鋼鐵股同石化股嘅盈利，升幅都以倍計，而其他亦多有理想增長。江西銅業（358）今年盤數好正，預計全年營業額可望上升50%至50億元人民幣，上半年盈利預計亦增加50%，隨着業績改善，江銅嘅派息比率今後亦會維持在50%水平。
銅價跌咗6年，到去年年底才回升，業界預期銅價上升周期已開始，江銅未來兩三年業績應可穩步回升。今年江銅產量增加（上半年已上升48%），加上價格回升，估計全年盈利可達2.8億元人民幣，增64%。
銀建國際（171）持有江銅9%，約2.5億股，去年應佔盈利1430萬元，今年可上升至2345萬元。以江銅噚日收1.68元計，銀建持股值4.2億元，每股已值0.32元。
銀建業務主要分3大類，除投資外，尚有物業發展及基建，提供穩定收益。物業項目主要在北京，總建築面積500萬方呎，工程已開始，明年進入收成期；至於基建項目則透過佔50%的中基建設經營，已投資9個項目，總投資金額21億元，02年貢獻8170萬元，未來投資以供水、供電及供氣為主，目前正考核優質投資項目，提高回報。
銀建02年（12月年結）獲利1.03億元，升66%，每股盈利7.9仙，派息3仙。03年江銅及基建業務貢獻增加，而洽售河南及武漢項目預期亦會帶來特殊項目收益，估計每股盈利可升至9仙，派息4.5仙，以基建股而言，PE和息率都吸引。近來唔少紅籌股私有化，銀建現價0.8元，每股資產淨值逾1.6元，亦有誘因。
郭兆誠