七月十三日，仍然有二萬人到中環遮打道靜坐，要求立會與特首全面普選。由七月一日發展到而今，香港人要求政治改制，似乎最有可能達到嘅，就係二○○七之後立法會全面直選。林瑞麟根據基本法附件二（香港特別行政區立法會的產生辦法和表決程序）第三段話：立法會產生辦法須經全體議員三分之二多數通過，行政長官同意，並報全國人民代表大會常務委員會備案。唔使林瑞麟提醒，我哋都知道明年選立法會非常非常重要。主張全面直選嘅候選人，一定要奪得三分二（即四十人）嘅席位，即係要贏晒直選三十席加功能團體十席。各位上街嘅有志之士，明年一定要全面參加投票，拉埋親朋戚友去投票至得。
支持直選人士之中，遮打道上居然有一位現任政府人員，就係中央政策組成員練乙錚博士，睇《明報》報道，練博士唔止參加靜坐，重捐款支持爭取民主㖭。以政府人員身份，擺明車馬嚟表態，練博士可說奇兵突出，唔通博炒？以後特首交帶劉兆佳嘅項目，會唔會畀練博士去做呀？中央政策組有不同政治意見，顯示特首已無凝聚力，內部肯定四分五裂，據路透社消息話，特首自己另有「南書房」，劉兆佳嘅意見比唔上邵善波咁有影響力，練乙錚更加係潮州音樂㖭！練博士果然有學人風骨，唔做智囊，返去科技大學教書好過啦。