家福道：
好媽媽學新派齋菜煮俾阿女食

無論你是否與佛有緣，都不妨趁今天──觀音誕這個日子，吃得「齋」一點。素食不但對身體有益，且在酷熱天氣下，清淡食物其實更添胃口。今日，信佛嘅好媽媽特別找來煮齋大廚傳授新派齋菜的做法，希望煮啲新嘢畀囡囡試吓。當然，她會趁此機會露一手，表演吓咁啦。

記者：吳佩璇　攝影：林栢鈞、梁細權
鳴謝：普光齋（23842833）
逢星期一至三、五出版

信佛已經20年的好媽媽Nancy，請來齋菜館「普光齋」的大廚示範新派齋菜。大廚陳威師傅入廚十多年，都專一地只揸齋菜的大鑊鏟，陳師傅話：「話明食齋，煮嘅時候最緊要少油、少芡，尤其家陣天口熱，煮得愈清淡就愈好。」
學過大廚教授嘅新派素食，輪到Nancy示範自己煮開嘅傳統齋菜。她當年做茶樓，無心插柳之下跟茶客去拜佛，且逢初一、十五及菩薩生日等日子，都必然食齋，甚至連自己生日，都預埋朋友陪她食素：「我生日叫埋朋友食素，你話幾功德無量哩！」

鹹豆漿吊味　如意白玉卷
入行多年雖獨沽一味煮齋菜，但陳師傅認為煮齋其實一啲都唔「齋」。好似今日示範的這道如意白玉卷，就是陳師傅自創的新派素食。表面上不過是腐皮、紫菜加豆腐，但點睛之處是不用芡汁，只靠一杯鹹豆漿來吊味，夠晒搞鬼！看似平凡的配搭，背後原來花盡心思－－腐皮煙韌與豆腐滑溜兩種淡口的材料再加一片爽而有味的紫菜，剛剛恰到好處。

用咩料：
豆腐2磚、腐皮兩張、紫菜16塊、鹹豆漿2杯、白菜仔少許

好易煮：
1.每磚豆腐一開八，腐皮剪開成小塊，每塊約10cm×20cm，備用。
2.用腐皮分別捲起紫菜和豆腐，並用麵粉漿封口。
3.將腐皮卷落鑊炸至金黃。炸起後宜用滾水再拖一拖，這樣可吃得更清淡。
4.白菜仔加鹽烚熟。
5.豆漿煮熱，加約半茶匙糖及3茶匙鹽吊味。煮好後如芡汁般淋在已炸起的腐皮卷上，白菜仔伴碟即成。

夏天啱食　北菇節瓜脯
這是Nancy在佛堂的師兄教她做的。由於做法簡單，囡囡韻攸又鍾意食冬菇，所以即使不是齋期，Nancy也會煮這道菜。適值炎夏，節瓜能消暑清熱，所以特別啱食。

用咩料：
冬菇4両、節瓜1斤、薑兩片、冰糖粒4-5粒

調味：
素蠔油2湯匙、生粉2茶匙、麻油少許、半碗水

好易煮：
1.節瓜洗淨去皮，一開二。然後灑些少鹽上面，下鑊走油，撈起備用。
2.另冬菇下薑片、鹽兜兩下，再下冰糖，加水煮腍。
3.下節瓜及調味，加水冚蓋燜約20分鐘至入味。