黎瑞恩（小恩子）嫁咗畀金利來集團太子爺曾智明後，冇幾耐就大咗肚，預計呢個月中會生得，所以呢排好多記者喺佢九龍塘嘅屋企守候住。結果記者喺等咗十幾日後，終於都影到相，因為前晚佢同一個女伴坐住一架寶馬七系車出嚟，成班記者梗係即刻追車，後來佢同朋友喺尖沙嘴美麗華商場落車，見佢腹大便便，落車時好笨好論盡。
小恩子個肚大成咁，見佢都行得幾辛苦，記者問佢幾時生得？佢話：「唔知幾時喎！你哋話我喺呢個咁熱嘅時候佗住個BB係好辛苦，但我覺得你哋咪重辛苦，我要入去食飯啦！」原來小恩子當晚相約咗朋友喺老飯店一齊食晚飯。個肚大成咁重周圍去，真係服咗小恩子喇！
二人女子組合Twins身為甲、乙型肝炎預防大使，日前身體力行打咗肝炎疫苗後，今次兩位超級偶像重會化身成為童話故事嘅主角，而劇本就由有興趣嘅朋友創作，只要創作加入預防肝炎嘅元素而被選中，到時就有機會同Twins同台演出，既可以發揮大家創作嘅天份，又可以增加大家預防肝炎嘅知識，何樂而不為！
田蕊妮同男友杜汶澤強烈反對廿三條，噚日田蕊妮喺中環出席一間酒樓活動時就話：「阿澤返咗內地拍嘢，我一知道梁錦松、葉劉淑儀辭職，就即刻打畀佢，佢聽到都好愕然。」跟住佢又話：「咁樣就證明市民力量係幾大，絕對唔可以低估，唔係話假期先多人去。」
蒙嘉慧（YoYo）噚日到銅鑼灣出席一個手袋專櫃開幕儀式，吸引唔少男士到場。YoYo出席今次嘅活動就可以一世任攞手袋用，𠵱家佢重傾緊做該牌子嘅亞太區代言人。近日YoYo喺廣州忙緊拍《功夫足球》，問到佢有冇見過女主角之一嘅容祖兒時，YoYo就話：「因為rundown唔同，呢幾日都無見過佢。」
何佩儀早排同媽咪去美國度假有豔遇，識咗個有拉丁血統嘅靚仔。何佩儀話當時自己喺邁阿美沙灘曬太陽，個男仔行埋去同佢傾偈，之後大家就交換咗電話號碼。早兩日何佩儀喺廣州，拉丁靚仔同佢通過電話，對方喺美國嘅金融機構任職，何佩儀覺得佢條件唔錯，諗住做吓朋友先，再睇吓有冇得發展喎。
