以「掃把頭」獨特形象力敵千軍嘅葉劉淑儀突然辭職，八方當然唔少得要去拜訪吓呢個髮型嘅設計師高先生。記得舊年，呢位高氏優美髮型設計嘅東主亦接受過傳媒嘅訪問，佢嘅舖頭位於坪石邨鑽石樓地下，當時因為葉劉幫襯，引來眾街坊嘅話題，估唔到呢位髮型師原來咁叻，做到保安局局長嘅生意。
但原來有苦自己知，高老闆噚日似乎唔多鍾意八方不請自來，抱怨自從揭發咗葉太喺佢舖頭飛髮後，不單止葉太少咗嚟，其他幫襯嘅顧客都少埋。不過對於呢位老主顧，高老闆就好關心佢嘅新聞，重對葉太評價甚高，猛咁讚話如果香港有多幾個好似佢咁嘅高官，香港就有得救，如果董建華好似佢咁，香港更有得救。
傳真︰2623-9278
電郵︰