大班鄭經翰暫時封咪，做替工嘅李鵬飛愈戰愈勇，噚日突然爆料，透露舊年政府推出國安法藍紙草案前，老董曾經分別搵過佢同佢師傅鍾士元大Sir幫手推銷，飛哥話佢覺得唔妥所以唔制，估唔到當年做過老董太傅嘅大Sir都耍手擰頭。
飛哥話大Sir認為草案最大問題，係涉及傳媒部份冇加入公眾利益做抗辯理由，因此唔肯出山為老董抬轎；23條立法結果搞到一鑊泡，大Sir唔應承老董幫手果然係明智決定。
飛哥𠵱家成個倒董中堅分子同民運鬥士咁款，言論在愛國愛港人士眼中甚為出位，《大公報》有個專欄作家日前就批評有人大代表參與倒董有失身份，雖然文章冇點名，但所指何人呼之欲出；飛哥噚日就對號入座，話自己只係想為香港人爭取民主，如果要托大腳做擦鞋仔，𠵱家班忽然愛國派全部要行埋一邊。
不過有老左派嘀咕，飛哥一個人基本上搞唔出乜嘢花樣，一定有個幕後黑手，飛哥亦講過有位政壇高人教路；但嗰位老左派唔肯明言幕後黑手身份，只係講係港英時代「孤臣孽子」，哦！八方一聽當堂明白晒！有傳聞話飛哥係田北俊師傅，估唔到天外有天，人外有人。
傳真︰2623-9278
電郵︰