名模翁為德三月尾在美國誕下一雙孿生兒子，她暫時把三個多月大的兒子留在美國，獨自返港接受纖體療程。翁為德希望回復苗條身形，再跟兒子和夫婿拍一張全家福，以便讓兒子留下美好回憶。
名模翁為德和夫婿鄒兆龍三個多月前榮升父母，二人的愛情結晶是一對可愛的孖仔，產後體重一度達一百八十磅的翁為德獲皇室纖形贊助產後收身，所以她把一對孖仔留在美國由老公照顧，自行返港接受纖體療程。
翁為德的孖仔鄒昊寯和鄒昊熹現在三個多月大，兩個都長得肥嘟嘟，母子相隔異地，翁為德不時心掛掛，昨日她在電話中說：「我有時會拎佢哋啲相出嚟睇吓，以慰相思之苦。每日一定最少同老公通一次長途電話，因為我朝早打過去，啱啱好係美國嘅夜晚，老公可以講畀我知囝囝嘅最新情況。」
一對孖仔在沒有母親照顧的日子裏，鄒兆龍便要父兼母職，雖然他有保母幫助，但為嬰兒洗澡和換尿片的工作，他絕不假手於人。
翁為德說：「老公做呢啲嘢好爽手，囝囝由出世開始，老公就全面照顧佢哋，而我最叻就係𠱁囝囝開心，同佢哋傾偈。」
問翁為德為何不帶囝囝回港，她說：「因為囝囝喺美國出世，醫院幫我哋辦出世紙手續最快要四個月先有，所以囝囝搞唔到護照離境，我咪惟有自己一個返嚟囉。」
促使翁為德決心減肥，除了是她要重投模特兒工作外，主要都是為了一對孖仔，她說：「我生咗佢哋就好肥，真係唔敢同囝囝影相，怕影衰佢哋，所以我希望盡快收身，以最靚姿態影張全家福。」翁為德表示目標是回復產前的一百二十八磅。
採訪：比華利
