梁錦松終在一片批評聲中宣布辭職，有學者形容，梁錦松任職財政司司長期間政績乏善足陳，可說是歷任「財爺」中表現最差的一人；有立法會議員更批評他一事無成，「花巧嘢就多，但實質嘢就冇做過。」
民主黨立法會議員黃成智批評，梁錦松能力有限，任職財政司司長期間亦無任何政績，可說是一事無成。「佢花巧嘢就多，但係實質嘢就做唔到，過去幾年除咗失業率不斷攀升之外，財赤又未能止血，再加上涉嫌偷步買車事件，更加令佢身敗名裂，如果早啲辭職都或者可以挽回啲民望，但係𠵱家市民對佢已失去信心。」
黃成智說，既然梁錦松無能力，辭職不會有影響，反而政府若能覓得更佳的人才出任財政司司長，相信對香港的發展更有利。
理工大學應用社會科學系助理教授鍾劍華也指出，梁錦松擔任公職以來，「花招多，犯錯又多，但係就冇乜建樹」，相信他離職對政府的運作影響不大，相反更可令政府從此拋下梁錦松這個政治包袱，有利日後管治。
城市大學社會科學部高級講師馮偉華則形容梁錦松的表現乏善足陳，是歷任財爺中表現最差的一人。「佢上場之後根本冇清晰嘅方向，最初就向市民派錢，小恩小惠；其後就大刀闊斧控制財赤，不斷向小市民開刀，又淨係識得討好國際評級組織，令到全港市民方寸大亂。」
他指出，在涉嫌偷步買車發生後，梁錦松早應引咎辭職，但他卻眷戀權位，令市民大失所望，相信他今後難以再得到市民及中方的信任。「𠵱家市民覺得佢一文不值，即使中方陣營，佢都唔會再得寵，所以可以好肯定講一句，佢政治生涯已經『玩完』。」
城市大學社會科學部講師蔡子強更認為，「葉劉淑儀辭職先，一定會產生骨牌效應。如果阿松唔辭職，報紙就會寫：『葉劉辭職，梁錦松去向如何？』𠵱家起碼挽回一啲自己最後嘅尊嚴。」
本報記者