恒指變化唔算大，升71點，一般大藍籌升幅都唔過2%，滙豐（005）爬高50仙，升幅只係0.5%，但對啲Call輪嚟講，正股小小變化代表佢哋大大變化，例如昨日所提嘅滙豐Call輪9631，單日就急升26%。
好多藍籌Call輪槓桿率勁爆，跟正股升之時，升到你笑，但若然正股行錯方向，則蝕到你面青。槓桿率大，其實係兩面刀，賭高槓桿率Call輪，贏大輸大，食得鹹魚抵得渴。
大藍籌中，和黃（013）比較標青，收52.50元，升1元，Call輪9765收44.5仙，彈升19%。隻輪9月到期，溢價1.8%，槓桿率11.8倍。溢價低，繼續有爆炸力，正股再升三兩蚊嘅話，隻輪可以彈跳6成以上。當然正股若然唔對辦，隻輪亦好易得番1半。以目前大市氣氛而言，正股繼續向上居多，隻輪亦係。
近排國企股七彩繽紛，個別細隻紅籌股亦炒到飛起。大隻紅籌落後，可以留意吓啲相關Call輪。華創（291）收7.05元，微升5仙，免費送少少華潤水泥，獎品嘅價值有限，第日除淨，唔會調整得太多，唔會影響Call輪溢價。華創Call輪9270抵買，9月到期，輪價6.6仙，溢價1%，槓桿率10.7倍。兩個月內，如果正股升11%，隻輪可升107%，正股升11%嘅可能性，不容抹煞。
章盛