荃灣朗逸峯一期，四百一十伙逾千呎單位，推出只係一個月多啲，就已經沽清，發展商之一嘅長實高級營業經理黃思聰話，原本諗住要賣幾個月，估唔到咁快賣晒，搞到佢要加快刨熟二期資料，準備開售。
朗逸峯第一期單位面積由一千二百一十六到二千九百六十三方呎，屬豪宅物業，聽講發展商畀代理嘅佣要四千萬，中原地產就認真威嘞，攞咗一半。
中原一姐劉瑛琳話，已經問準發展商借朗逸峯示範單位，下個禮拜一做慶功宴場地，當然唔少得請埋米飯班主發展商啦，夾埋有成一百人。佢重透露話會有魚子醬招呼㖭。
黃思聰透露，設喺紅磡漁人碼頭嘅朗逸峯第一期示範單位，遲啲會拆嘞，跟住就搭建第二期，但重未決定會搭邊種面積嘅示範單位。唔知同夥伴，嘉華及信和傾吓會唔會有啲頭緒呢？
一向與傳媒談笑風生嘅顯盛保柏首席顧問蒲祿祺，獲選為RICS特許測量師學會全球主席，打破該會135年來首名喺英國以外當選嘅人士，認真威水，噚日佢以主席身份開記者會，重宣布喺上海成立中國支部，又會喺上海同北京開分部，佢要求記者提問內容，只可與RICS有關，唔好問樓市會升幾多跌幾多，大家都好聽話——結果係完全冇嘢問。
不過，散會後記者就一窩蜂擁到台前，不斷追問樓市表現，完全兩個模樣。蘭西相信蒲祿祺會體諒大家苦處，記者唔係唔關心佢哋個會嘅動向，只係更加關心樓市未來表現啫！
上半年樓市唔好景係人都知，但兩大代理集團都話有錢賺，專做樓按轉介業務嘅經絡集團，聽講生意都唔錯，就算「沙士」期間，佢哋嘅生意跌幅都比大市細。
喺4月「沙士」高峯期，經絡嘅轉介申請宗數跌咗四成，但5、6月已比「沙士」前多幾個百分點。若果以1至5月計，大市成交少咗三成樓按生意，佢哋就只係少一成幾生意。
出名賣樓快嘅信和集團，唔單只賣樓手法火速，連搭建示範單位都一樣神速。近排賣緊嘅屯門海典軒，睇過示範單位同售樓處嘅人，都會感受到呢個「水上白宮」嘅豪華氣派。聽信和講，原來呢個示範單位係極速完成，正式畀公眾參觀前3日，現場重係滿布泥沙雜物，幾日後迅速完工，豪華嘅裝修設計，令人眼前一亮。
不過，個售樓處前身係帝庭居示範單位，一樣咁豪氣，話唔定就係咁，令海典軒可以慳番啲工程時間。
售樓處設喺人流暢旺嘅屯門市廣場，有埋呢個富麗堂皇嘅示範單位就更人氣旺盛，好彩樓上嘅住客，冇因為咁投訴發展商。
新地元朗YOHOTown係近期熱賣嘅新盤，發展商噚日分別頒獎畀兩大地產代理集團之餘，中原重準備咗啲好有意頭嘅禮物畀發展商，就係生果兩大籃。全部係紅色嘅生果，包括蘋果、車厘子、火龍果等，寓意「紅盤開售」，夠晒心思。
另外，中原憑促成YO豪宅交易嘅市場佔有率較高，獲頒YO豪宅紅盤代理，同YOHOTown嘅點題顏色襯番，而美聯就獲頒銷售大獎。
蘭西
電郵地址：
