真係愈嚟愈覺得港股好似97年牛市或2000年科網股熱潮，晨早起身，求其見到邊隻股出現大成交，又或者有多少消息配合，有理冇理撲落去玩一轉即日鮮，幾乎次次都可以得手，咁瘋狂嘅日子，恐怕唔會長，真係要小心。
由於乜嘢股都可以炒得一餐，加上唔少芬佬變炒家，向工業股老闆求貨，工業股老闆唔趁機減持套現先至奇，好似富士高（927）咁，日前就有老闆減持。
經紀黃又話，龍記（255）收市後有大股東減持套現，以每股3元，配售1500萬股，套現4500萬元。
龍記雖然業績唔錯，但股價一直係咁升，累積升幅大，噚日再升4.92％，收3.20元，原來已經係今年高位，大股東唔趁𠵱家減持，重要等幾時？
至於配完股之後得唔得？經紀黃話，今次係由一間歐資行負責，所以唔應該睇得太淡。
除咗龍記之外，噚日股價見52周新高的建發國際（223），據講亦將於短期內搞批股。
慕容小初