如果八方冇記錯，葉劉淑儀係董建華第一個埋班嘅問責局長，當時大家都覺得葉劉咁忠心，第三屆特首都有得佢做，點知呢個世界永遠峯迴路轉，葉劉竟然係第一個向老董辭職嘅問責高官，快過梁錦松，親自將「掃把頭」放進歷史。
至於梁錦松，更係董生董太重點培養嘅接班人物，可惜所託非人，阿松迫於形勢，步葉劉後塵成為歷史名詞。
八方識咗葉劉好耐，知佢鍾意我行我素，有自己一套。佢嘅下屬都對佢讚口不絕，話佢勤力冇偷懶冇卸膊。不過，佢嘅性格就被人覺得比較強硬同固執甚至霸道，可能就係觸發今次被迫要走嘅原因。其實係人都睇到23條嘅辯論到咗後期變咗係意氣之爭，好似細路仔鬥氣一樣各不相讓，外界睇見都好笑啦。
葉劉有幾固執，由佢要捍衞佢個髮型告到去平機會就知道，聽講「掃把頭」個花名係阿牛個仔嘅傑作，八方唔係贊成亂改人花名，但係連個小朋友都睇唔過眼，佢大姐都應該反省吓。
漫畫家筆下嘅葉劉更多姿多采，𠵱家佢一下子要離開政壇，香港肯定會冇咗咁熱鬧，再冇人會開口埋口叫人放長雙眼睇，或者叫人信佢。
傳真︰2623-9278
電郵︰