相信大多數玩PDA同數碼相機嘅人，第一樣添置嘅配件應該都係記憶卡！最近旺電有部份電腦舖頭表示，CompactFlashTypeI/II同SD卡呢兩款記憶體，都開始有缺貨迹象，自上月初向多間批發商發訂貨後，截至現在，連到貨日期及批發價錢都重未定到！
所以𠵱家大家市場上買到嘅，好多都係舖頭內嘅存貨，賣埋真係隨時斷貨。暑假又到，又係班年輕人買電子產品嘅旺季，有商舖負責人認為：「呢兩款記憶卡，𠵱家我剩番每樣十零張，批發嗰邊話唔知幾時先有貨返，價錢推高就必然㗎啦！最怕到時有價都冇貨！」
記者、攝影：朱崇德
加入流動用途嘅WebCam，愈出愈多功能，一般大多以提升感光元件解像度為主，而呢款DIGICAM雖然只有三十萬像素CMOS，相片解像度得640×480唔算高，不但勝在功能攞晒分，除咗內置8MB記憶體，可拍攝最多104張相片外（320×240），重有10秒延遲自拍、連環快拍等功能，當然唔少得係接駁PC當WebCam咁用，最正係體積超細小，約莫只有半張八達通咁細，掛頸或擺落衫袋都好輕鬆，放係手度簡直好似掌心雷咁樣，拎起就影，最啱預算唔多，又鍾意周街影SnapShot之人。
記者：徐影龍
RooteckTechnologyLtd
查詢電話：29470868