大作家最近遊興大發，去完台灣，又去大陸，卒之返到香港，搵左丁山飲下午茶，為求方便，去置地廣場嘅美心集團轄下咖啡座。下午四時，呢度全場滿座，坐得比較擠逼，聽到隔籬茶客談話，唔多爽，真令人懷念以前太古大廈嘅GiGi。去「文華酒店」當然最好，不過今時今日，自己都覺得奢侈一啲。
大作家對文學好有敏感度，最憎香港嘅廣告界啲copywriter亂咁作，將啲同音異義字亂咁用，教壞細路。佢最近響台灣、大陸睇到一啲女人「隆胸」（海峽兩岸叫豐胸）藥丸廣告，覺得夠晒幽默，特登抄低畀左丁山欣賞。台灣一個廣告口號係：「令男人不能掌握你！」嘩夠絕噃，左丁山立即叫好，大作家諗諗吓，又話：「我可能記錯咗，呢句口號或者會係：令男人不能一手掌握你！」左丁山聽咗，笑到幾乎噴出一口咖啡。大陸嘅豐胸藥丸廣告又如何呀？大作家話：「又係一絕，充份運用到中文口語，就係：大不了退款！」左丁山立即叫好，請大作家飲茶，抵到爛！
笑完一大餐，晚上與萬事德食飯，嘆完萬事德啲法國珍品甜品，先至聽到佢講夥計故事，哎吔，好彩啱啱食飽，否則食不下嚥。原來佢位夥計喺七月十日凌晨四時許送報紙時撞車受傷流血，萬事德立即叫佢收工返屋企休息，夥計就上咗架265M巴士返天水圍，喺屯門公路近汀九就飛咗落汀九橋，造成二十一人死亡、二十人受傷嘅慘劇。萬事德夥計兩小時內碰上兩次車禍，可謂禍不單行，希望佢早日自深切治療室脫險。