英皇唱片歌手陳冠希、BMG旗下的陳小春、環球唱片的黃凱芹以及劉德華等歌手，昨日就有唱片公司和電視台高層涉嫌賄賂案件被廉署拘捕一事，紛紛作出回應，其中陳冠希及小春異口同聲指事件與他們無關，實行劃清界線。
英皇集團負責人楊受成及旗下高層職員，以及環球唱片負責人陳少寶、旗下歌手麥浚龍（Juno），無綫電視助理總監何麗全及《勁歌金曲》監製陳家倫等人，昨日被帶返廉政公署協助調查一宗唱片公司涉嫌賄賂電視台高層案。
Edison、小春、梁家輝、杜汶澤及余安安等，昨日在貝沙灣拍攝中國星新片《我老竇係鐵金剛》，Edison表示並無就有關事件助查，以及仍未同英皇公司的人通過電話。Edison說：「我係支持英皇娛樂，Juno亦係我朋友，希望冇事啦！」
「有錢人都唔識我」
英皇歌手謝霆鋒等受邀助查，問Edison會否為事件而擔心？他說：「我冇出唱片一段時間，所以唔擔心。因為我只係簽英皇唱片合約，唔係旗下藝人，但當然會關心呢件事，我係英皇唱片嘅人，佢幫過我好多。」
陳小春則說：「攞獎？𠵱家至係年中咋，我攞嘅係細獎，唔關我事。ＢＭＧ係德國公司，我冇參與個遊戲，歌手有獎攞，係高層去玩，唔關我事，唔知乜事唔好去下結論，等水落石出先。」
問他是否認識陳少寶？小春說：「見到打招呼囉，見到何麗全都係打招呼，叫聲全哥。」那認識麥紹棠嗎？小春說：「冇打招呼喎！有錢人都唔識我係邊個啦。」
「啲獎幾錢一個？」
身在北京拍戲的劉德華，昨日透過助手表示也有聽聞這消息，但由於不清楚事件，故不便作出任何評論。
至於相不相信有人以利益交換獎項，華仔表示他相信每一個藝人也希望憑自己實力得獎，不會有人希望用錢買獎。
而黃凱芹昨日接受記者訪問時則說：「我離開咗樂壇好多年，加上咁多年我都冇乜攞過大獎，而我未聽過啲獎有得買？幾錢個呀？」
「英皇冇人覆機」
香港電台歌星統籌周國豐昨日在港台接受訪問，曾有周刊指周國豐和英皇高層關係特殊，他說：「肯定冇人（廉署）搵過我哋協助調查，成件事都唔知乜事，知道至可以回應，多謝大家關心。我打過電話畀英皇，不過冇人覆機，亦都打過電話畀Juno經理人，都係冇人覆。」
環球旗下歌手黃伊汶昨日在商台做錄音訪問，她說：「我未搵少寶，佢應該好快冇事，我支持少寶，聽講已經放咗出嚟。件事搞到有好多版本，又話容祖兒都有份（助查），但佢都唔喺香港，所以唔係聽到就信。」
採訪：魯萍
攝影：何國豪、胡恩宏
