喺呢個無論打扮定係性取向都可以「非男也非女」嘅年代，唔理lady'swear定係man'swear，只要着得好睇嘅話，一班潮人姊妹都照樣掛上身。近排我羅拉又喺日本女星身上，發現一個既feminine又帶點玩味嘅中性打扮方法，嗰種方法就係打呔喇！小妹妹深田恭子或者斯文淑女菊川怜都已經率先示範點做個型得嚟另類嘅女士！
女人打呔當然唔係新鮮事啦，但近排就有唔少日本女士興着到好似深田恭子呢個look咁。大家一睇就明，所謂嘅新打呔法，就係用一條比較幼嘅領呔，嚟襯一個好女性化打扮嘅look。當中如果有件好似恭子着住嘅連呔背心，咁就更加方便同活潑啦！
菊川怜去親公開場合都會好鬼斯文，最近佢出席日劇《因為愛所以欲被愛》記招時，以ChristianLouboutin嘅連身裙襯PAOLAFRANI嘅毛毛高踭鞋，然後再加上一條黑幼呔，表現出一貫斯文中見爽朗嘅形象，難怪唔少時裝設計師都讚佢有taste咗。
「恭子追擊手」上戶彩嘅衣着好飄忽，一時好少女、一時好男仔頭，一時又會好似呢個拉鏈背心裏面攝條黑領呔咁，性感得嚟又會有啲令人想入非非嘅Feel。
同場加映金美侖戴雅絲（CameronDiaz）去日本時，亦趁熱鬧，重更加玩嘢咁將條呔前後調轉嚟打，想學到佢咁Yeah嘅話，真係少啲功夫都唔得！