就有唱片公司涉嫌賄賂電視台職員一事，中建電訊主席麥紹棠和兒子麥浚龍（Juno）昨日同被廉政公署拘捕。Juno日前接受本報專訪時，對於外間不少人認為他有今時今日的成績，全賴他的有錢父親，Juno卻說：「我覺得佢哋好膚淺，佢哋已經將有錢同冇料畫上等號！」
大部份父母都希望自己的兒女升讀大學，不過麥浚龍的父母卻沒有這樣的想法，因為Juno十六歲便決定不再升學，因為他對演藝事業有濃厚興趣，而其父母亦沒有阻止他，反而對他百分百支持。
Juno說：「就算我十六歲時唔入呢行而繼續讀書，我都會選擇讀導演呢科，我好開心父母咁支持。」Juno入行以來備受抨擊，對此Juno無奈地說：「我好唔明白點解啲人會咁諗，我覺得佢哋好膚淺，佢哋已經將有錢同冇料畫上等號，不過我知道我冇可能捉住每個人去解釋，我知呢個世界上實有人唔鍾意自己，我承認出道時我好介意呢啲報道，但係我冇得揀。」
Juno更透露有一件事是入行後從來不敢做的，他說：「我唔敢去睇樓，因為其他藝人咁做，啲人都會覺得佢哋搵到錢去睇樓，好正常，如果係我去睇樓嘅話，佢哋一定會話『睇吓呢個敗家仔，入行乜都做唔到，淨係識得用阿爸啲錢去買樓！』，佢哋從來唔覺我有付出過。」
近來，劉德華與麥紹棠之間的糾紛鬧得熱烘烘，Juno自然成為被追訪對象，他說：「我唔會問阿爸件事係點，呢件事只要有一方接受傳媒訪問，我就會成為被攻擊嘅對象。點解所有人都只會覺得我阿爸唔啱，反而從來唔會認為係另一方有問題？」
Juno的身高、外貌都曾經成為眾人的話題，不過他卻不覺得這些外在條件有礙他的娛樂圈事業，他笑說：「各花入各眼啦，我覺得自己都OK，靚仔嘅，有啲fans都話鍾意我靚仔，而且我覺得自己係一半偶像派，一半實力派。」而Juno於拍照時更不時要求攝影師影他的右邊臉。
撰文：李珮洳
攝影：林德雄
場地提供：香港氣槍射擊會
化妝：MaeVon(BeautyTeah)
髮型：EdmondLeung
