八方噚日晨咁早走咗去合和實業股東特別大會捧主席哥頓胡應湘場。
哥頓一見到八方就即刻滔滔不絕咁講佢構思嘅港珠澳大橋，雖然條橋仍未正式話去馬，但哥頓已經為條橋起咗個好勁嘅名，就係叫做「回歸橋」！佢話如趕及二○○七年香港回歸十周年通車，就更加好。
哥頓又話，通車當日若果能夠請得國務院總理溫家寶嚟剪綵，咁就最好啦！不過，哥頓講完之後補充，雖然個人好想盡快搞掂呢條大橋，但現時仍欠珠海、廣東省及中央政府嘅批准，至於錢方面就完全沒問題，因為集團搞緊分拆上市，銀行亦答應借錢。
哥頓嘅公子胡文新噚日隨同老父出席大會。有行家問哥頓點解唔畀胡公子做合和公路嘅主席，要自己做？身為合和營運總裁嘅胡公子話，係因為香港搵唔到咁有基建經驗嘅人。哥頓聽罷笑笑口咁話：「咁識擦鞋嘅！」引得哄堂大笑。
（圖）哥頓豎起一隻手指，喺非常時期真係好敏感。
傳真︰2623-9278
電郵︰