偕章子怡東京搶灘
馮仁昭四圍超：李連杰唔想世界有英雄倒米

【記者森林檎東京直擊】內地當紅女星章子怡，噚日連同李連杰、導演張藝謀，去咗東京落成冇耐嘅GrandHyattTokyo酒店，出席舊年喺香港上映電影《英雄》嘅記者會。雖然呢套戲喺日本比香港遲咗大半年先上映，但噚日都吸引咗超過一百名日本同外國記者嚟採訪。
當被問到心目中嘅英雄係邊個時，章子怡就好正經咁講：「我覺得任何人也可以是英雄，在非典疫潮中犧牲性命救人的人，絕對是英雄。」

張藝謀拒建紀念館
信教嘅李連杰就話好希望世界冇英雄出現，佢覺得亂世先至需要英雄。另外，咪睇佢係一個武打明星，原來李連杰係唔鍾意打打殺殺㗎。
至於揚言細細個已經係黑澤明影迷嘅張藝謀，話早前曾有人斟佢喺故鄉起一座以佢個名為名嘅電影紀念館，不過佢就覺得自己未夠班，所以推咗呢個計劃。

余安安養女唔靠李萬祺
余安安離婚之後好努力咁搵錢，佢噚日就喺貝沙灣拍電影《我老竇係鐵金剛》，戲入面佢重會着三點式，真係搏到盡，佢重同中國星簽咗兩年合約。余安安話：「兩個女都同我住，咁我都要供佢哋讀大學㗎，都係靠自己好過靠男人，而且佢（李萬祺）都冇咁嘅能力。」

李泳豪戥楊思琦辛苦
李泳豪噚日去咗香港賽馬會跑馬地會所，出席「暑期馬術運動推廣」活動。講起佢個緋聞女友楊思琦，近日拍攝電視劇打到手瘀腳瘀時，李泳豪好戥佢辛苦咁話：「我都有打畀思琦安慰佢，知道佢拍得好辛苦。」至於騎馬方面，李泳豪細細個已經跟老竇李家鼎學藝，𠵱家重學埋啲高難度動作㖭。

馮德倫指被雜誌「老屈」
馮德倫日前同好友徐濠縈一齊去滑水，但有報道就話佢哋相約嬉水，馮德倫噚日喺電話度就咁話：「我不嬲都同徐濠縈佢哋好熟，唔知點解嗰本雜誌要『老屈』我哋，唔知係咪唔係英皇旗下嘅藝人就要被人針對。報道話我『𠝹女』同口甜舌滑，乜佢哋同我傾過偈咩？」

阿燦全叮宴小惠飛身捧場
廖偉雄（阿燦）噚日喺土瓜灣六福飲食中心搞咗個全叮宴，招待佢嘅圈中好友好似梅小惠、黃允材、劉錫賢等人，試食微波爐食物。梅小惠試過之後都大讚好味，佢話同阿燦識於微時，好佩服佢做人積極同樂觀嘅精神，所以阿燦一開聲，佢即刻將自己當係禮物咁出席支持。