常在舞台上勁歌熱舞的鄭希怡（Yumiko），原來小時候不喜歡跳舞，因她自小被迫參加各種課外活動，令她苦不堪言。而Yumiko有次跟父母到西湖旅行，不小心跌落水，被父母及時救起後，竟吐出一條金魚。
在上海出生的鄭希怡（Yumiko）是家中獨女，父母為了讓愛女成材，不欲她有嬌生慣養的性格，故在Yumiko四、五歲時，就安排她參加一連串課外活動，由跳舞到彈鋼琴、打網球、游水和書法，甚至連跆拳道亦學過，令Yumiko整個童年都在上堂中度過，甚少與其他小朋友玩耍。
Yumiko表示學芭蕾舞十分辛苦，她日前說：「我嗰時唔鍾意跳舞，係被迫學，而且嗰時個老師好嚴格，做唔到拱橋就唔准起身，為咗令我條腰軟啲，就要我做到心口貼大腿，如果做唔到，老師就成個坐喺我身上，真係好辛苦，試過一邊做一邊喊，重搞到我啲腳趾生晒水泡。」
Yumiko續說：「其實我細個時都有嬲過父母，覺得佢哋將以前做唔到嘅嘢，要我一次過做晒，而且我嗰陣時真係好羨慕其他小朋友可以出街玩，不過我𠵱家梗係知道父母咁做係對我好。因為我學過跳芭蕾舞，所以入行時好快可以上手。」
Yumiko又自爆小時候差點沒命，有次她跟父母到杭州西湖旅行時，因行得太近岸邊，一不小心跌落水，幸好當時父母救起她，才保住她的小命，不過最有趣是Yumiko上岸後竟然嘔了一條金魚出來。
Yumiko說：「總括嚟講，我嘅童年係完美嘅，又多人錫，又冇受過苦同挫折。」
採訪：駱華齡
