鄭裕玲（嘟嘟）前晚在將軍澳電視廣播城錄影新節目《至趣相投之不一樣的對話》，請來廖偉雄接受訪問，嘟嘟透露早前已訪問過簡炳墀及李鵬飛，稍後會訪問男友呂方及一名政界人士。
嘟嘟表示最想訪問甄妮和蕭芳芳，她說：「簡炳墀講咗好多嘢，有講阿梅同霆鋒，但唔知TVB點出。甄妮減肥咁成功，又開演唱會，事業得意，我想同佢傾吓偈，但係佢同蕭芳芳都未應承。」
問嘟嘟訪問呂方時，話題可會避忌？她說：「冇，幾年前都訪問過佢啦，我哋事無不可對人言，乜都講得，佢咁耐冇出嚟，大家都想知佢近況。」
至於會否談論感情問題，嘟嘟說：「你哋清楚過我啦，我又唔諗結婚住，又唔會生仔，或者講吓相處之道啦。」她又透露將會擔任香港小姐競選評判。
採訪：卓寶花攝影：陳慧安