任賢齊成為adidas的內地代理，他日前巡視北京新店時，透露希望明年可以設店一百間。而且他為免尷尬婉拒一些廣告合作，曾有人在他面前放下五百萬現金，他也不為所動。
任賢齊現在除了是歌手和演員外，還榮升老闆，是品牌adidas在內地的代理。他日前便到北京的首間adidas專門店巡視業務。
甫進店內，任賢齊已禁不住試穿波鞋和運動服做生招牌，其間有不少顧客向他索取簽名，任賢齊也有求必應，最後他還和員工合照。
任賢齊透露是在偶然機會成為老闆，他說：「其實都係一個好偶然嘅機會下做咗老闆，係我同幾個好朋友夾份。我哋喺上海已經有六間分店，北京係第七間，我哋嘅目標係喺明年全國有一百間專門店，我哋重傾緊希望可以喺內地開flagstore，咁就可以有啲限量版嘅貨，到時發展重可以大啲。」
現在任賢齊不時都會穿上adidas的服裝，問到他不怕失去其他廣告合作的機會嗎？任賢齊說：「其實都有好多人搵我拍波鞋同服裝廣告，佢哋都唔介意我係adidas嘅代理，但係我自己就覺得唔係咁好，感覺好似怪怪咁。
「有次試過有人攞住五百萬現金放喺我面前，佢話你拍呢個廣告，啲錢就係你嘅，但係我都冇要到，我諗我會堅持幾年，幾年後可能我唔紅，我先會乜都做。」
此外，任賢齊與楊紫瓊主演的電影《飛鷹女俠》在北京拍攝的戲份已完成，明日便會移師東京取景拍攝，而該片的老闆林建岳早前更專程到北京探望任賢齊。
採訪：胡比攝影：林德雄
