每日好多主婦都為今晚食乜餸而傷腦筋，全素宴，係夠晒慳，但無啖肉落肚，怕仔女唔夠營養；若餐餐大魚大肉，後生女嫌油膩，老人家又話唔夠健康。掙扎一輪，仍無定案？不如參考新晉師奶阿儀的平價菜式，有魚有蛋有菜，一家大小營養均勻，合共只要$17.50，請埋隔籬屋阿B仔同奀妹，都得！
記者：楊一凡 攝影：陳智良
示範：阿儀(順利邨讀者)
阿儀在嫁入夫家前，一星期至少到未來丈夫家吃三次飯，有時早收工就藉口幫奶奶手預備飯菜，乘機偷師，奶奶見未來新抱如此好學，亦樂此不疲地循循善誘。在電腦普及的時代，婚後阿儀也躋身為網民，她最愛瀏覽飲食網站：「一次跟奶奶在茶樓吃了碟怪味雞，一試鍾情，翌日就跟奶奶在家中試煮，試了兩次，還是差一點點，我心有不甘，遂上網搜尋資料，一看才知原來我們漏了花椒粉！」第三次做實驗時，執齊材料，把辣油減半，就做出一道老少咸宜的菜式。
雖然說做人新抱要慳家，但這並不表示一日三餐只吃至cheap的食物，阿儀說：「門鱔係海魚，都算係貴價魚，肉質同鮮味都頂呱呱，若果魚肉買貴價些少，配料就不妨買平啲嘅鹹酸菜，兩蚊已夠晒炒一碟，就算食剩，翌日送粥都得。」果然精打細算！
用咩料：
門鱔魚 6両
鹹酸菜 半斤
薑 四大片
好易煮：
1.門鱔切件，然後用清水沖洗，並索乾水。因為是鮮魚加鹹酸菜同炒，故魚肉事前不用醃。
2.在鑊中加一湯匙油，燒熱後加兩片薑爆香，然後才放入門鱔同炒，見魚肉微焦，即可先撈上來。
3.鑊中加兩湯匙油，先加入餘下的兩片薑爆香，然後是鹹酸菜，炒五分鐘；之後將門鱔倒入鑊中，兜一分鐘便可上碟。
阿儀和丈夫都很喜歡吃菜脯蛋送粥，但囡囡嫌菜脯蛋賣相唔靚，於是好媽媽就在菜脯蛋表面，撒些零碎的配菜，不但看上去花碌碌夠醒神，青椒和大頭菜更豐富了菜式的口感；至於蝦米當然是補充鮮味，若想鮮味更突出，不妨把蝦米一開二，爆香後才加青椒和大頭菜，而橄欖菜令炒蛋更香。
用咩料：
雞蛋 4隻
菜脯 半碗
青椒 半個
蝦米 1湯匙
大頭菜 2片
橄欖菜 1茶匙
紅椒 少許裝飾用
好易煮：
1.先用清水浸蝦米，菜脯、大頭菜、青椒和紅椒切粒，備用。
2.在油鍋中加兩湯匙油，扭中火，油熱後先加青椒炒30秒，再入蝦米和大頭菜同炒兩分鐘，炒好後先用碟盛好，待用。雞蛋拂勻後，待用。在鑊裏加三湯匙油，炒菜脯粒，見色澤金黃，可加橄欖菜，兜勻。
3.扭大火，倒入蛋漿，讓雞蛋包圍菜脯粒，煎成蛋餅後，用鑊鏟切碎菜脯蛋餅，以便食用。把菜脯蛋餅用碟盛好，面頭撒上蝦米、青椒及大頭菜粒；再綴以紅椒絲便可。
位於順利邨平台商場的糧油雜貨店利興隆，是阿儀購買醬油配料的心水店。阿儀說：「老闆是潮州人，開了二十六年，夠老實。店內的乾貨海味齊全，其他配菜如大頭菜、欖橄菜、榨菜和冬菜等亦有售，重有潮汕人常用的豆醬及醬油。」