阿松偷步買車事件隨時被告上法庭，若美國財長遇上類似情況，相信美股早就大散。不過港股噚日仍若無其事，好似當阿松事件冇到，好友繼續推高港股，恒指升71點，收報10207，成交逾110億元。執筆時葉劉同阿松相繼辭職，唔知今日個市有乜反應？
究竟梁愛詩會否好似上次唔告胡仙咁，以公眾利益為理由而不起訴阿松，抑或決定「大義滅親」？論高尚情操嘅好人，一場SARS都可以死幾個；論開源節流嘅本領，好多師奶都係高手，香港又何須憂慮阿松唔做財爺。
卓悅控股（653）首日掛牌係威係勢，全日收1.03元，較招股價高出14.44%，成交金額達7310萬元。不過，另一隻業務相似的彩虹國際（8079），上市無耐就都搞到一鑊泡，令到阿虎對化妝零售股存有戒心。
升岡（485）派完成績表後，噚日宴請分析員兼吹水一番，股價大升11%，收0.203元。公司3月底公布業績轉虧為盈賺6112萬元，重話為咗應付美國客戶需求，將動用1億元擴建廠房，至於錢從何處來，唔使問都估到會從股市抽水啦。
Intel公布業績靚，帶挈品質國際（243）勁升12.2%，而ASM（522）亦升4.4%。電盈（008）趁住美國科技股造好，批股抽水逾30億元。據聞有人收到風，將近日急升的SUNDAY（866）沽出套現，轉為吸納電盈配股，累到SUNDAY急挫24.69%，成交4039萬元。
阿虎