巴西噚日響金盃僅勝洪都拉斯二比一，完場前輸嗰球十二碼，唔單止累到上盤客由贏變輸、一殼眼淚，重搞到自己出線形勢被動，呢鋪真係累人累己。查實呢支森巴大軍由洲際國家盃到𠵱家合共五場波都未幫人贏過錢，重唔係發波瘟？
淨係講呢兩場金盃，上場對墨西哥都重可以話贏形勢輸波，但噚日對洪都拉斯唔能夠大勝就咎由自取。淨係講上一仗試過中柱嘅卡卡，今仗上半場先射失十二碼，到下半場佢又近門失機。呢位哥仔好波係好波，但腳風咁唔順，睇佢應該拜吓神至好落場喎。
巴西嘅比賽成日落飛，假如噚日閣下趁一球/球半盤入票，都未至於連渣都無。純粹個人意見，睇啱巴西都係趁早買好啲。
皇馬日前落實響來季實行三隊長制，一般情況下魯爾係隊長，但如果佢不在陣時，中場古迪或者後衞卡洛斯就會代替佢嘅職務。呢個宣布本身唔特別，深層意義係代表皇馬決定留用古迪，其他球隊都係唔好打佢主意啦。
巴治奧響早幾日完成咗右膝韌帶手術，雖則據報話呢次只係清除破碎韌帶手術，但風險就緊係有，結果個手術好順利，對佢延長足球生涯有好大幫助。我求大俠作為佢球迷當然鬆一口氣，亦希望呢次係佢足球生涯最後一個手術啦。
列斯剩番嘅值錢貨之一維杜卡終於有人吼，聽聞佢正同里昂密斟。其實傳過幾間大球會想斟佢，衰在佢始終係非歐盟球員，無辦法唔成為最後一批逃亡嘅球員。假如維杜卡走埋，三季前幫列斯躋身歐冠盃四強嘅主力人腳正式散晒。往事只得回味。
中國甲A聯賽周三有場北京現代對陝西國力，我求大俠俾呢場波盤路嚇親，由噚日晏晝開盤嘅讓半/一球，七個鐘內竟然連跳五級去到讓兩球，最後終盤仍要讓球半/兩球。結果主場嘅北京現代淨勝三球，有份落注嘅波友收啲料認真勁，好嘢！不過莊家就……