陳豪同陳慧珊噚日出席由香港房屋委員會喺慈雲山中心舉辦嘅「七月份清潔打氣之星」活動，大會安排咗佢哋兩個以螢幕情侶姿態出現，「拍住拖」宣揚清潔訊息。
陳豪同陳慧珊奉命喺商場巡視環境衞生，兩人沿途有講有笑，好似真嘅情侶一樣。陳豪重表現佢嘅紳士風度，一路行一路幫陳慧珊開路，可以話係一個不折不扣嘅護花使者。
問陳慧珊係唔係同陳豪拍拖巡視商場時，佢話：「唔好咁講，乜拍拖呀？我當佢係姊妹。」陳豪即時不甘示弱咁話：「我當佢係兄弟囉！」不過，當陳慧珊聽到陳豪就嚟拍一套要剃頭嘅新劇時，佢就即刻安慰陳豪：「唔使擔心，你光頭都咁靚仔啦！」
蔡少芬（Ada）噚日喺將軍澳廣播城出現，當佢聽到前度男友吳奇隆拍拖及傳出婚訊嘅消息時，Ada表現得好高興，重戥對方開心咁話：「祝福佢搵到個好嘅，都係開心嘅事。」對於自己嘅感情路，Ada一啲都唔急咁話：「做女人得人寵啲，相反做人老婆就要寵人，所以我都係享受被寵感覺多啲。」
黃伊汶（Emme）新碟噚日推出，佢到新城接受訪問時，重帶埋六呎高嘅大型海報送畀電台。佢話：「我想將呢個人咁高嘅海報放喺少寶（陳少寶）間房，後尾見房唔大就貼張細啲嘅海報喺佢門口，好似門神。」雖然Emme同少寶傳過緋聞，但仍不避嫌疑咁做，佢話：「等佢成日見到呢個女，當有工作嘅時候就可以諗起畀我做嘛！」
謝霆鋒同容祖兒前日喺北京，出席英皇演藝專修學校成立嘅記者會，噚日中午就已喺北京返咗香港。兩人雖然搭早機，但落機時重係精神奕奕。
不過唔知霆鋒係唔係吸取咗上次喺加拿大返港，着黑衫俾記者影到有頭皮嘅教訓，噚日就着咗件白色衫同埋戴冷帽，都可以話叫做有備而戰。
汪明荃（阿姐）同一班粵劇老倌包括羅家英、阮兆輝、吳千峰等，噚日喺將軍澳廣播城錄影最後一集嘅《紅星追聲名歌SING》。對於羅家英喺阿姐演唱會上公開求婚食檸檬，噚日阿姐就話未有改變呢個決定：「我都唔得閒考慮，好忙，諗都冇諗過。」而羅家英就話：「明年會再向阿姐求婚，一年一次。」
