高達長賣長有，紅足二十幾年，出乜就Hit乜。最新搞作係殺入PC，推出近年勁賣嘅USB記憶手指。呢款名為EasyDisk嘅USB記憶卡，容量只有32MB，六款記憶卡分別收錄元祖高達RX-78-2、渣古、馬沙專用紅彗星、大魔、鐵球等經典角色，卡上有齊立體頭像、MS型號、所屬組織等標示，單睇賣相已經夠晒抵死過癮，記憶卡內更預載高達Wallpaper，嘩！不但Fans肯定投晒降畀錢，就算一般PC用家都會覺得好吸引。六款高達記憶卡預定八月尾推出，估計售價約3,980日圓（約港幣$258），單單以32MB容量計，點都係噱頭兼搶錢之作。
記者：徐影龍