現年二十五歲嘅英國巨胸名模佐敦（Jordon）上年自爆陀住個仔夏菲（Harvey）嗰陣，食咗當地好紅嘅靚仔偶像GarethGates隻豬，當時Gareth為咗保持形象，死口唔認自己嘅處男之身，係毀咗喺佐敦呢個全世界都知佢放蕩嘅女人手上。
不過，GarethGates最近終於改口風，承認自己好Naive（天真），喺佐敦大緊肚嘅時候同佢搞嘢，真係該煨！
憑勝出英國PopIdol大賽而晉身娛樂圈嘅GarethGates，近排備受唱片公司力捧，佢嘅唱片銷量喺英國都唔錯，所以即使佢出咗名講嘢時有嚴重口吃，但事業發展都非常理想。上星期先至去完泰國同fans慶祝十九歲生日嘅佢，最近因為知道佐敦會爆自己同啲名人嘅性史嚟出書𢱑銀，Gareth惟有快佢一步，向雜誌《Heat》承認自己做咗件蠢事。
上年重誓神劈願話唔識佐敦嘅GarethGates，當時重講過想告對方誣衊，不過，Gareth最終認衰話：「我嗰陣只係得十七歲，啱啱搬去倫敦，好坦白講，係佐敦慫恿我咁做，我因為唔想屋企人知道，所以我唔認，𠵱家我覺得自己當時好Naive，從呢件事得到一個教訓。」