大市升越萬點大關後，波幅明顯擴大，噚日恒指一度跌近一萬點，但低位又見有大盤吸納國企，恒指收10135，升13點，期指低水10點，投資者預咗美股周二會調整。
升股榜頭15大升幅都超過20%，最勁係信用卡防盜（1051），大升52%，而第2位嘅第一龍浩（875），高收8.9仙，升幅39%。呢輪好多跌到殘嘅股票，都由低位大幅反彈，好似龍浩咁，升100%亦非無可能。
佑威（627）有新料，原來集團在鞏固中國市場後，已成功進軍歐洲市場，委任Castellet為佑威於西班牙的獨家分銷商，代理佑威品牌休閒服及納米環保系列紡織產品，Castellet在西班牙擁有逾1300個百貨公司和專門店的客戶，佑威有信心透過Castellet的分銷網絡，打開歐洲市場。佑威股價噚日早段高見0.41元後回軟，整固後可再上，目標0.47元。
講開成衣股，唔好走雞隻金利來（533），噚日高收0.57元，雖大升11%，但都只係起步而已。金利來財況穩健，手持大量現金及無銀行負債，每股資產淨值1.96元，筆者始終認為大股東遲早會有所動作。由2月開始，金利來形成一個大圓底收集形態，噚日破0.53元的頂部阻力，照度上去，最少可見0.7元。
金威（910）亦係成衣股，但雙線並進，在科技項目發展方面亦做得有聲有色，聽聞同中科院合作銷售的納米材料，正傾緊一單同醫療有關嘅大生意成事機會都幾高。作為半隻科技股，金威現價着實偏低，聽講噚日就有基金大手吸納，成交大增到9500多萬股，係14個月以來最墟冚嘅場面。金威股價已升破250日線，而10日線預計幾日內亦會升逾250日線，大升浪已確認，股價有機會重上去年5月高位0.55元水平。
早輪推介過的建星環保（8011），已升到0.98元，睇勢重有得去。建星主要生產紙材，今年印刷業大旺，紙品供不應求，建星生意亦應接不暇，相信公司已進入收成期，轉盈之後，盈利有機會幾何級數上升，定下止蝕位，可刀仔鋸大樹。
郭兆誠