施念慈小時候長得並不漂亮，樣子似男孩，膚色亦較黑，連父親在醫院也抱錯女兒，而老公陳鴻業也取笑童年時的施念慈有如醜小鴨般。而童年一次拐帶事件，令她至今仍留下深刻烙印。
在杭州出世的施念慈是個七星女，小時候長得像個男孩，皮膚又黑，一點也不漂亮。施念慈說：「我爹哋好大懵，去到醫院又唔睇清楚，將人哋嘅BB女抱住好耐當係我，後來媽咪發現，佢先知自己搞錯咗。我細個皮膚黑，因為我有印尼血統，嫲嫲係印尼人，亦有越南血統，婆婆係越南人。好彩到咗十一、二歲，我開始靚咗同白咗，似番係上海人嘅媽咪。」
當施念慈幾個月大時，便與家人遷往香港居住，但由於公公、婆婆身在上海，所以要經常返回內地探親。施念慈憶述：「我屋企人講上海話同國語，所以啱啱讀幼稚園嗰陣時，唔識聽廣東話，讀咗一年幼稚園，先至識同同學仔傾偈。」
讀幼稚園時，施念慈被一男一女跟蹤，幸好她及時機警，才不致被人拐帶，此事對她來說至今仍非常難忘：「有一次我喺學校門口等媽咪嚟接我，有一男一女行埋嚟搣我塊面，要我跟佢哋走，我好驚，我一路行佢哋不停跟住我，後來我行咗入一間藥房，坐咗喺度等媽咪。如果我俾人拐咗，可能賣咗去內地整斷手腳做乞兒，咁就慘咯。」
採訪：張止寒
