特首夫人董太頻頻製造金句，句句精釆，將只識講「早晨」嘅阿董完全比下去。不過7.1之後接連幾次萬人民主集會，唔知董太係咪受驚過度，最近佢出席公開場合都一反常態，驚驚青青唔敢開聲，如果佢真係從此「封嘴」，就真係香港一大損失。
好似噚日紅十字會接收一個高爾夫球會捐嘅一百萬元抗炎善款，身為紅十字會會長嘅董太同其他紅十字會高層一齊收支票。捐款人駿豪集團主席朱樹豪致辭時，企喺旁邊嘅董太唔知點解面黑黑冇乜笑容，到人哋講完嘢，董太第一時間就想由人群背後溜走，要由主持人提佢企返原位頒紀念品。
董太一向鍾意發言大家都知，連執垃圾、探疫廈婆婆都有爆肚笑料。噚日頒完獎，主持人順理成章邀請董太同大家「講兩句」。點知董太堅拒，話運作方面嘅嘢交由秘書長陳啟明講就得。
儀式一完，董太走都走唔切，咁又唔怪得佢，因為記者已經追住佢問點睇幾次倒董集會、特首近排心情係咪好差。你話佢點答？惟有扮聽唔到急急腳走人。
其實7.1大遊行紅十字會都有出力，嗰日天氣酷熱，佢哋喺維園一帶沿途擺咗十幾個救護站，救助感到不適嘅市民，董太應記一功。
傳真︰2623-9278
電郵︰