今日亮相歐冠盃外圍賽第一圈嘅球隊，都係國內聯賽冠軍分子。能夠參與歐冠盃呢個歐洲最高榮譽球會級賽事，睇落好威風，不過大部份都係有苦自己知，真係唔踢好過踢！
好似威爾斯球隊巴利鎮咁，今日佢哋就作客馬其頓對華達，淨係需要行軍費用，不過次回合主場時，場租已經要畀三千鎊（約三萬八千港元），重未計其他開支，對佢哋嚟講已經好「喇利」；愛爾蘭冠軍布咸美恩斯亦係今日作客出戰，但係球員要自己顧自己，波衫設備都要國內慈善團體幫佢哋募捐咋！
照咁睇，今晚佢哋實唔會輸大大鑊，如果唔係次回合無晒睇頭，搵鬼買飛入場睇波咩，而且晉級又有筆獎金落袋，實行打甩髀呀！
巴塞隆拿前鋒古華特終肯減人工同球會續新約。其實呢幾年都不斷有英超球會想斟佢，最近車仔都講過話想撬佢過檔，可能佢見阿巴莫域治新上場就即刻燒銀紙咁買人，一年半載後都唔知咩環境；𠵱家喺巴塞都叫做有列卡特呢個契爺睇住，就寧願留低踢多幾年收山囉！
阿仙奴前鋒簡奴最近頻傳會轉投保頓或切爾達，但來季倫敦市重有個「簡奴」，咪係佢細佬C簡奴囉！乙組球會彼得堡就想簽入呢位前阿積士後衞，目前已經去到等批工作證階段，而C簡奴都有喺幾日前對阿仙奴嘅友賽上陣，重協助球隊贏一比○㖭，今勻真係細佬醒過大佬嘞！
原以為精忠報國呢啲情操係古代至有，原來西班牙都有個「岳飛」，咪係西維爾嘅新仔雷耶斯囉！佢啱啱就同球會簽咗一紙七年新約，成盤冷水淋落去一直想斟佢嘅阿仙奴頭上。張新約更有一個贖身價，邊間球會肯畀一億鎊就可以買佢。嘩！睇嚟雷耶斯真係想喺西維爾踢到收山咁喎！
德甲係體力化聯賽，喺度搵食嘅球員一般身材都較高，好似拜仁中場波勒就高一米八九同重百九磅；但禾夫斯堡新簽返嚟嘅阿根廷新星迪阿歷山度，生得矮得一米六三高，重要輕到嗰百二磅唔夠，我求大俠擔心佢會俾其他球員撞散。睇嚟禾夫斯堡教練羅巴要幫佢操多啲體能。