有時炒股同做人一樣，最緊要把握時機。
小初記得上周二提過，經紀陳話文化傳信（343）隻公司輪2306首日掛牌，應該有搞作，叫小初趁機上車，點知偏偏第1日股價唔係點郁，隔咗一日先至湧上去，真係俾佢激死。
經紀陳話，事緣小初太心急，亦太過貪心，炒股票成日想即買即大升，好似炒即日鮮咁。其實就算係炒莊家股，有時都要講耐性，如果俾人震一震就走人，根本賺唔到大錢。
小初就唔係咁諗，除咗基金股之外，對於炒味太濃嘅股票，實在唔多喜歡坐貨呢類高危動作。
文傳繼日前大升後，噚日股價仍企穩，上升3.39%，收0.305元，成交金額有成3000萬元。至於隻輪就微升0.84%，0.12元。
經紀陳話，上次提過文傳主辦嘅產品推介會，將於明日舉行。公司又於下周一公布業績，但業績方面，就唔存有太大幻想。
不過，佢收到料話批輪尚未散得出，所以股價仍然有機會向上，重叫小初信埋佢呢次。
慕容小初