呢排有機會與商界前輩、退休賓架、教授碰頭，話題點都冇法子離開七一遊行與董特首。商界前輩，年過七十，本來已收晒火，但講起特首，仍然㷫烚烚。佢話：「無論點好，有幾十萬人上街，就係領導人嘅政策失誤。我哋識佢咁耐，知道佢為人好好，唔係奸嘅。但弊就弊在佢不時叫我哋對地產市道畀意見，次次聽完就算，正一係意見接受，做法照舊，咁點係聽到市民聲音呀！」
退休賓架以前成日鬧傳媒整蠱特首，鬧左丁山之流諸多事幹。但𠵱家就唉唉聲：「真係爭佢唔落，將國安法搞到一鑊泡，點收科呀，出年民建聯選立法會，俾特首害死啦！」退休賓架對國安法中之「叛國罪」則有解釋，佢話：「我哋咁老，乜嘢未見過。某議員老竇喺四九年跟蔣介石過台灣，做過市長㖭；後來同國民黨唔啱，五幾年嚟咗香港，投向大陸。老蔣當時好嬲，曾經當面鬧佢叛徒，背叛中華民國。但北京就話佢愛國，擁護革命。叛國與愛國，觀點與角度而已。眨吓眼幾十年，呢位老愛國已歸道山，佢位公子就成為愛國議員，強硬支持二十三條立法。如果你問吓議員，田少係不義之人吖，還是佢老竇係不義之人，相信議員唔識答。」退休賓架知道晒好多富豪家族嘅來龍去脈，見到一啲現時嘅紅人氣燄不可一世，就忍唔住揭吓佢底牌，左丁山聽完，覺得好有益有建設性。