港股噚日出現好淡爭持之局，淡友欲借英文《中國日報》一篇對七一遊行極具批鬥性的評論員文章反攻，不過好友仍不退讓半分，恒指收報10135，升13點，成交達120億元。好友暫時略為佔優。
該篇評論員文章是否代表中央意思，阿虎當然唔清楚，不過阿虎好記得，中銀曾發表過聯滙脫鈎分析報告，引來朱總狠批，並形容「香港是一個相當敏感的城市」，要中資企業慎言。其實，中央若有說話，大可對港人直言，何需假手於人？雜音咁多，中央與港人又如何建立互信關係。
權智（601）剛宣布業績靚靚，不但虧轉盈，重賺4312萬元，每股派末期息1.5仙，加上轉攻智能手機，由CSL在港獨家代理，消息刺激該股午後急升20%，成交高達3675萬元。
權智將推出XploreG18型號手機，每部約2000元，料半年可賣15萬部，收入貢獻2-3億元，邊際利潤約20%，勢將成為公司新增長動力。據聞，呢項新業務吸引唔少芬佬注意力。
第一龍浩（875）沉寂咗好耐，噚日突然平地一聲雷咁勁升39%，收報8.9仙，成交1231萬元。黑客話，有傳聞此股可能賣盤，亦有人話莊家搵到新水源再炒過。
Sunday（866）前日勁升38%，噚日發表聲明話不明急升原因，但股價再升30%，成交更增加至7383萬元，睇嚟收購合併之說並非無因。據聞，此股被專炒私有化的基金睇中。
阿虎