近排豪宅市況好熱鬧，發展商即刻趁勢推盤，何文田君頤峰日前突然開始收票，樓盤資料隨之逐漸曝光。蘭西聽消息人士講，個盤其中一個煞食賣點，係有二十四個二千七百方呎單位，五房雙套房設計，三個廁所，另有士多房、工人房同工作間，一般呢類尺碼都不過係三房到四房，重冇咁多「雜項」㖭。
呢款單位喺市區相當罕有，應該唔憂冇承接。消息人士估計，呎價可以去到七千五到八千蚊，入場費二千萬。
當然，樓盤都有近期熱賣嘅特大單位，即三千六百到四千呎嘅複式。
由新世界、信和置業、華人置業、萬泰同九龍倉等合作發展嘅君頤峰，總數有七百伙。另外，市傳八座複式以呎價八千蚊成交。
沙士之後，樓市氣氛又開始好番啲，發展商都不斷開新盤，重搵大批代理幫手推銷。好多時因同期有多個盤開賣，令代理人手非常緊絀，隨時順得哥情失嫂意。
利嘉閣執行董事廖偉強話，公司見最近賺到錢，同埋睇好樓市應進入健康期，決定喺明天搞大型招聘會，增聘二百名前線員工，職位由代理至區域經理不等。另外，利記又會重點增開分行配合擴充。
元朗YOHOTown內購，中原、美聯兩大代理集團都相當落力，本區經紀固然不敢怠慢，美聯重搞咗個畀外區代理嘅大獎以示鼓勵。各區只要造成二十宗YOHO成交，頭三名分行可瓜分一萬蚊獎金，分別係五千、三千同二千蚊。結果勝出嘅三區，第一名分別係荃灣區南豐分行、沙田大埔區新達分行，同港島南新樓專組。
美聯董事布少明話，美聯連港置嘅促成YOHO交易宗數，市場佔有率超過六成，奪得銷售大獎。
YOHOTown公開發售詳情今日公布，但噚日經紀就查到，恒生銀行提供嘅付款優惠內容，一按首兩年免息及延期供本，利息有補貼，第三年利息P減一厘一，到第四年就P減兩厘半。
愉景灣向來受外籍人士，同嚮往異地情調嘅都市人歡迎。香港興業就快開賣嘅海澄湖畔二段逸澄閣，每層大堂有唔同設計裝飾，叫做八國風采。
即係有八款選擇，有西班牙、墨西哥嘅熱情、都市魅力嘅曼哈頓，中式同日式、同埋北非情懷嘅摩洛哥等。裝修費達十幾二十萬。每層首名買家有選擇權。示範單位今個禮拜六開放，已預先成交咗七伙，呎價三千四。
蘭西
電郵地址：
