七月九日黃昏中環中心地段變成行人專用區，五萬人團團包圍立法會。幸好田北俊及時退出行政會議，逼董先生臨時煞掣，暫時押後國安法，否則嘅話，七月九日晚上嘅中環可能變成七月十日清晨嘅屯門公路，慘不忍睹。聽一啲消息人士講，自由黨核心就因為呢樣嘢而好驚，毅然轉軚？
五萬個良心派聚集中環，當然夠晒和平，如果當晚強行通過國安法，有兩派人在立法會外示威，好易擦槍走火，現在逃過一劫，要多謝田大少。賓架C話廖暉與田少相識好多年，大家係熟人，田少唔會聽錯料，收錯風嘅！呢鋪押落去，為董先生消弭咗場大風暴，中央應該多謝田少至啱。
中資行高層F君聽見賓架C咁講，甚表贊同。據F君嘅北京消息，中央於七一一役，卒之明白到董先生喺香港「上無核心，下無基礎」，覺得非常頭痛。上無核心者，乃係商界、知識界都唔維護特區政府，行政會議如一盤散沙，各說各話，董先生完全組織唔到一個核心領導班子；下無基礎者，就係幾十萬人上街，證明董先生得唔到群眾支持。毛澤東講過：「革命唔係請客吃飯。」但中央察覺到，香港嘅革命事業，唔係請客（甚麼嘉年華會慶回歸）；就係請吃飯（好多愛國團體靠大型晚宴來招攬群眾）！F君話中央面對董先生呢個問題，比香港市民還要傷心。