個市果然又嚟過，恒指話咁易就升破一萬點，重突章一百點㖭，收報10122。
噚日所提嘅恒指Call輪9785，發揮爆炸力，恒指升2.1%，隻輪就升夠25%，升幅雖然唔細，但都未能打入10大升輪榜上。有隻長實Call輪9764則上榜，升幅37%，引死人。長實（001）發威，升1.25元，收50.25元，帶動Call輪。
長實升破50元之後，每跳價位就係25仙，步伐可能加大，對Call輪有利。9764昨日跟正股跟得相當貼，爆炸力冇咁勁嘅同類輪9829，則未有跑貼，收66仙，升8仙，呢件吼得過，着數在溢價吸引，11月中過後至夠鐘，大把時間，溢價得嗰2.7%，槓桿率7.6倍其實唔曳。長實彈多3蚊計，揸隻輪大概可以𢱑4成利錢。
如果嫌啲大藍籌升得過急，想搵啲穩陣嘢埋手，可以考慮隻中石油Call輪9232。先睇正股中石油（857），昨日最高2.30元，收2.25元，只係爬高1格；睇埋另一件PE較高嘅石油股中海油（883），收12.30元，彈升55仙或4.6%，中石油遲早畀中海油帶番上去。
9232現價69仙，冇錯槓桿率3.3倍唔得吸引，但勝在11月先夠鐘，又有負溢價1.1%，最好嘅係，正股升嘅機會大過跌。正股係咁意升一毫，隻輪就升15%，其實都唔錯。正股升一毫，好易啫。
章盛