星期日民主發展網絡喺遮打道搞咗個2003民主集會，雖然人數只有兩萬人，冇7.1或者7.9咁多，但係市民堅毅不屈嘅精神就有如溫家寶總理口中所講嘅精衞。
民不畏死，學者也不畏權貴，齊齊站在台上響應大會嘅民主訴求。城市大學嘅蔡子強話，當日上台嘅十五個學者大部份係民主發展網絡嘅成員，分別嚟自不同大學院校。
城大除咗佢之外，重有張炳良、張楚勇、李芝蘭、成名、宋立功；中大有馮可立、陳健民同蘇鑰機；浸大就有陳慎慶同陳家洛；史文鴻來自理大、馬嶽屬科大；港大都有兩人，郭儀芬同陳祖為，陳祖為更係港大政治系系主任。
學者論政常有，但企出街頭就較少見，佢哋都係為咗一個理念，就係要普選特首、普選立法會。八方問佢哋怕唔怕因此被炒，有學者笑話，「唔怕啩，我係長約嘅教職員。」點知蔡子強就話，話雖如此，如果城大遲吓取消副學士課程，佢都分分鐘冇得撈。
蔡子強係中央政策組屬下社會凝聚力研究小組嘅成員，真係諷刺；但𠵱家社會嘅凝聚力全部喺街頭，個小組又做完晒嘢，相信好快收檔。
八方於是問小組召集人關信基點情況，佢話最後一份報告的確已經交埋，如果首席顧問劉兆佳唔再有新指示，各人大可度假去也。連《信報》前老總、現中央政策組顧問練乙錚都去參加7.13民主集會，佳叔睇怕都無話可說了。
（圖）十五位學者勇敢地站在台上，後排左起：張炳良、陳慎慶、陳家洛、史文鴻、張楚勇、馬嶽、李芝蘭、成名、宋立功、馮可立、陳健民、蘇鑰機、郭儀芬、陳祖為。前排持咪者為蔡子強。
傳真︰2623-9278
電郵︰