王菲雖然同竇唯離咗婚，但為咗個女竇靖童，阿菲喺北京時都間中畀竇唯見吓個女，都算係再見亦是朋友。佢哋兩個日前重不約而同到咗上海做嘢，重住埋同一間酒店，令唔少人有好多聯想。不過前晚呢對過氣夫妻卻各有各忙，各自為自己嘅生活打拼。
前晚王菲同黎明喺上海一條街道上拍談情戲，兩個卿卿我我之時，重有三個着住類似綠色公安制服嘅保安看守，見記者影相就馬上攔截，重用粗口勁鬧記者。大街大巷又唔係私人地方，點解唔影得相？其中一個保安用普通話，話黎明唔鍾意喎。
而另一邊廂，竇唯亦好忙碌，佢喺上海新天地一間ARK亞科音樂餐廳做騷，佢同新組成嘅六人樂隊「不一定」一齊演出，負責打鼓同吹笛。
竇唯睇嚟發咗福，雖三個鐘嘅演出好賣命，可惜對牛彈琴，觀眾唔識欣賞，自顧自飲嘢傾偈之餘，重要掌聲欠奉，對竇唯呢啲咁有性格嘅歌手嚟講，認真委屈。
之前滕麗名同記者講話男友魏駿傑俾向海嵐搣瘀，噚日向海嵐喺將軍澳電視廣播城錄影時話：「其實冇嘢，阿滕都有打電話畀我，同我講唔好意思，我知阿滕唔係真係嬲，不過之後我見到傑仔就講笑叫佢唔好行咁埋。」向海嵐知道要檢討吓，以後唔同人玩得咁癲，同埋佢強調自己唔會做第三者，因為佢唔想俾人鬧喎！
廖偉雄同黎文卓噚日喺土瓜灣六福記飲食中心，介紹佢哋最新嘅飲食生意，就係用「燦師傅」呢個品牌嚟製造一系列嘅即食產品，包括有餸、湯同糕點等食物，超級市場都有得賣。黎文卓話希望今次可以幫阿燦一年內搵到七位數字翻身，而阿燦就好落力咁表演食沙嗲菜肉包嚟做宣傳。結果佢一分鐘食咗七個，但一食完就即刻入廁所嘔，真係嘥料。
五人組合SKY噚日喺柴灣為「砵砵子漫畫」影封面相，今個月二十七號，英超聯嘅利物浦會嚟香港踢波，而砵砵子呢個卡通人物就畀利物浦香港球迷會選為吉祥物，SKY就被委任為青年足球大使，到時喺開賽前會有一個委任儀式，SKY話好開心可以同利物浦前鋒奧雲見面，作為球迷，呢個真係一個難得嘅機會。
已故影星關德興個仔關漢泉因為私人擔保「寶芝林」向中銀借貸，爭二十五萬重未還，俾中國銀行入稟申請破產。關漢泉噚日到咗金鐘高等法院聽審，由於關漢泉當初用間屋做抵押，而間屋係同未婚妻聯名，債權人代表律師要向債權人查詢間屋可唔可以抵押，案件延期至下周一再聆訊。所以噚日關漢泉去咗中環搵謝偉俊，向佢請教法律問題。
