港股重上萬點大關，創出今次升市新高，恒指以全日高位收市，報10122，大升210點，成交近109億元，上升股（不計認股證）逾540隻，係少見的高紀錄，市場氣氛熾熱。
國企升勢持續，三四線股更接連發力飆升。呢半個月來，推介的股仔中，表現最突出者，有大慶石化（362），噚日收0.53元，大升20.4%，比推介時的0.38元，更大升近40%。另外，漢登（448）推介時2.7仙，噚日收3.1仙，升14.8%；華豐（364）一日之內更大升25%，比推介時的0.67元，升幅更達74%。至於噚日推介嘅佑威國際（627），一日之內更大升21%。
中資消息果然有料到，話明大陸基金郁緊幾隻三四線股，佑威係其一，果然一開車就一放絕塵，成交1.82億股，更係16個月以來的高紀錄，今次破位，大升浪已確認。
除佑威外，大陸基金吼中嘅另一隻寶藏就係德信科技（1228）。上個月19號，有逾億股嘅大手成交，基金已經有咗貨底，不過，佢哋重未夠喉，之後股價就反覆走軟，好明顯係佢哋再喺低位收多一「浸」貨，噚日走勢有異動，升2仙，成交達4100萬股，比前大增5倍，照計收集已大功告成，跟隨佑威之後開車，現時50日線（0.425元）會有少許阻力，一衝破，大升浪又確認，初步目標指向2月高位的0.52元。
大陸基金睇中德科，明顯係智珠在握。先睇另一隻股票，就係新威國際（058），單係噚日就升咗13.3%，而半個月來就升咗41%。德科同新威可說係同門兄弟，大家在福建蒲田設廠，主力同樣係生產計算機同電子產品，家下急升之後，新威往績PE14.1倍，德科9.4倍，明顯大落後，而喺半個月來，德科股價亦僅升咗11%。呢輪工業股隻隻裝咗火箭，德科一發力，升上5字頭，不會令人意外。
德科有業績支持，今年盈利料有逾50%增長，每股盈利6.2仙，預測PE6.6倍，中線股價更有機會升上6字頭。
首長系全線上升，好事近，消息話首長四方（730）會行先一步，短期可「坐七望八」，大動作之後，可向1.0元水平推進。
郭兆誠