話說長實想喺天后食環署車房同毗鄰海旁土地，搞個MaritimeBazaar嘅旅遊、飲食兼酒店項目，上周五被城規會否決後，即日就有隱形人說三道四，話城規會阻住發展商幫社會創造就業機會、振興經濟喎。
城規會發言人噚日解釋，今次否決呢個計劃有幾個原因。首先係成個建議項目中，長實只揸住唔夠兩成地，其餘都係政府嘅，現行土地政策上，唔可以私下批出。
另外，長實話將車房保留喺酒店樓下，但交唔足環評報告資料，城規會委員都懷疑，車輛產生啲癈氣同噪音等，係咪真係唔會影響到住客呢？
委員重關心酒店太高，有成百三米，建議八十米就差唔多。重有係政府𠵱家未搵到合適地點搬走車房，同時要安置機電工程署嘅部份車輛，故車房07年前都唔可以拆，加上又有條最快2011年至起好嘅東廊連接路橫過地皮，時間上根本配合唔到。
莊士維港軒已接近現樓，樓下三間舖共一千二百呎，發展商會用嚟做莊士維港軒，及稍後推出嘅莊士明德軒售樓處，重會整個「非一般售樓處」。
一般售樓處通常都係放張長枱加幾部電腦，最緊要方便賣樓，不過莊士今次就好創新，諗住用咖啡室形式，參考好似著名嘅Starbucks、PacificCoffee嗰種自在風格，希望營造悠閒舒適嘅感覺，等買家揀樓嘅時候可以舒舒服服，咁樣買樓都開心啲。
銀行按揭產品周不時都要推陳出新，迎合唔同買家需要，連附送嘅禮品都要夠時尚，今次渣打銀行為深井海雲軒買家承造按揭，向每名客戶送兩部新款嘅Xelibri手提電話，即係呢排喺電視播緊非常出位嘅手電廣告牌子，夠貼市又追得上潮流。四款手機最貴三千幾蚊，至於送咩型號，銀行就話視乎借貸額多少。
噚日海雲軒記者會，就show晒四款手電，相當有型。嘉華陳玉成話，如果全部客都透過渣打做按揭，以樓盤共二百四十八伙，一部手電三千幾蚊計，渣打就會送出一百六十幾萬元嘅禮品。
先施百貨今日至十一月三十一日期間，有退稅自動增值優惠，最多可達退稅金額嘅兩成。
只要憑退稅通知書或支票正本，到先施任何一間分店，換購最高相等於退稅款項嘅現金禮券，就送多百分之二十畀你。即換購一千蚊，多送二百蚊，如此類推，每日每分店有一百個名額。
唔夠手快嘅唔使失望，只要有得退稅嘅，都可以免費獲贈先施現金券，每退稅二百五十蚊，可換一張五十蚊禮券，最多可換十二張，值六百蚊。
蘭西
電郵地址：