新特蘭負債纍纍，正面臨清盤嘅危機，近日慘到要向球員工會求助。查實呢隊波雖然降落英甲，但陣中仍有好幾個優質球員，衰在佢哋賣極都賣唔出，再咁落去呢班波好快因缺水玩完。
據講，新特蘭一直想賣走前英超聯神射手菲臘斯，同埋丹麥國腳龍門蘇連遜，搵番大筆套現；不過其他球會知道佢哋莫財，「趁火打劫」，出價有咁低得咁低，聽講米杜士堡斟菲臘斯嘅價錢只係二百萬鎊，認真係賤價。
我求大俠估計，好多球隊到季中就會出現傷病，要四處班兵，到時市場需求大增，新特蘭啲主力一定會升價。所以新特蘭如果頂得住半季，就有機會撥開雲霧見青天，至怕佢哋連呢半季都捱唔住噃。
巴西今次出戰金盃前途未卜，但肯定苦了國內勁旅山度士。對山度士嚟講，由於迪亞高、羅賓奴同艾歷斯等幾個大將要為國家隊服役，令佢哋呢段時間只能半力出戰，好似前日佢哋就吞維多利亞雙蛋，痛失三分後，落後榜首高士路六分，隨時「為國捐軀」而爭標無望。
意大利傳嚟消息，列高巴已經落實留效國際米蘭，條件係減薪三成。我求大俠記得佢舊年已經自願減薪，加埋今次再減，傳聞超過十萬鎊嘅周薪減吓減吓，真係唔見咗一大截。無計啦，佢加盟國米後都無咩佳作，加埋咁嘅市道，唔減薪都唔使旨意踢班霸囉。
早幾日我求大俠咪講過曲波轉會熱刺有阻滯嘅，最新消息係佢已心灰意冷，準備執包袱飛返大陸養傷，真係慘情。佢「師兄」李鐵就好景得多，雖然愛華頓重未宣布來季會唔會繼續用佢，但佢過幾日就會跟大隊去奧地利集訓，起碼有個希望吖。
唞暑期間走去染咗一頭金髮嘅傑斯，最近就決定將啲頭髮染番黑色，佢自己話原因係贊助商，希望佢KEEP番以前個乖仔形象。其實我求大俠覺得染咗金毛嘅傑斯，又唔係有型咗，重成個旺角古惑仔咁，就連佢曼聯隊友都忍唔住笑佢個頭肉酸，你話呢次傑斯係為錢定為面呢？