林敏俐有兩個妹妹，小時候父母忙於打理餐館，無暇照顧她們三姊妹，身為大家姐的林敏俐，小小年紀便要肩負着湊妹妹的責任，兩位小妹妹更常把她叫作「媽咪」。
香港小姐冠軍林敏俐給人斯文淡定、思想比實際年齡成熟的感覺。林敏俐表示自七歲時隨父母移民美國後，生活便迫使她成長，她日前說：「以前喺香港有好多親戚錫，一家人去到美國人生路不熟，我最細嘅細妹細我十年，媽咪喺美國開刀生佢，嗰時爹哋做記者成日唔喺屋企，我哋擔心媽咪太操勞，會影響個傷口，我十歲就開始學幫細妹沖涼、換尿片同埋沖奶。」
林敏俐表示有很多報道指她是富家女，但實際並非如此，她說：「我爹哋媽咪最初去美國都係做幾份工，其實唔係好有錢，喺後來先開咗兩間酒樓同三間茶餐廳，亦因為佢哋忙於打理餐館，所以我就負責車細妹返學放學，出席佢哋學校嘅家長會，所以以前細妹叫我做媽咪。」
林敏俐的父親兩年前因心臟病去世，令她更懂珍惜家人，林敏俐說：「我媽咪唔識揸車，你可以想像喺美國唔識揸車有幾唔方便，自從我返香港選港姐之後，我大妹就負責照顧媽咪同細妹，但係我同屋企人都會一日通幾次電話。」
林敏俐即將卸任，但目前為止她仍未能定去留，她說：「要一家人開會商量，我呢一年留喺香港發展，媽咪喺美國真係要兼顧好多嘢，不過最開心係兩個細妹都好識諗。」
採訪：卓美娟
