立法會終於通過賭波合法化條例，八方以為已經塵埃落定，原來重有餘波。八方收到讀者報料，話當日投支持票嘅余若薇，家公同馬會有千絲萬縷嘅關係。
唔係呀嘛，Audrey係人所共知嘅「公義女神」，乜咁都有黑材料？八方馬上翻查資料，同馬會最大關係嘅應該首推Audrey老公胡健維醫生，胡醫生以前同人合伙養咗隻馬「靈感」，已經退役，而胡醫生𠵱家係馬會賽事董事，有份監場，同時又係馬會遴選委員，不過都係義務性質。
究竟Audrey當日投票前，有冇申報佢老公同馬會嘅關係，八方真係唔記得；問番佢，佢話當時喺演辭第一句，已經講咗呢個關係，不過因為根本唔涉及金錢利益，所以冇再特別舉手申報。至於佢家公同馬會嘅關係，Audrey就驚呼家公已經仙遊幾十年，咁都有人攞嚟講？
傳真︰2623-9278
電郵︰