當年曾紅極一時嘅寶馬6系，自於多年前停產後，有不少車迷都想廠方能將之重新推出；若然你都有呢個想法的話，相信今年下半年你一定會好開心。因為喺九月舉行嘅法蘭克福車展上，廠方除會於場內展出全新X3車系外，亦會展出將於年底推出嘅全新645CiCoupe跑車。
從相片中可以睇到，全新645CiCoupe跑車造型圓渾流暢，襯以四輪巨型跑車合金胎軨，一派高性能跑車形象表露無遺；車廂布局亦會來得好有跑車味道，除備有承托力十足嘅跑車座椅外，亦備有多功能跑車軚環、先進嘅i-Drive系統等配備，享受至愜意。新車將以一台附有Valvetronic技術嘅4.4公升V8偈作動力核心，馬力及扭力輸出分別係333匹及45.9kgm，並附以全新SMG波箱，同埋輕量化車體結構，難怪新車0至100公里加速度僅為5.6秒，而極速更可高達240km/h咁快啦！