博鰲亞洲旅遊論壇噚日在香港開幕，雖然冇外國元首到會，但沙士過後仍有成千人肯嚟香港開會，起碼帶旺吓機場同酒店。
今次有啲好冷門嘅國家旅遊官員來港，例如太平洋島國瓦努阿圖（Vanuatu）旅遊部長JeanAlainMahe。Mahe部長演講時，好識做咁提一提特首董建華，但係佢就稱呼阿董為「香港沙士政府」的特首（CEoftheHongKongSARSGovernment），在場聽眾都好克制，冇乜人笑出聲。
八方早排講過，特區政府為咗避免「SARS」同特區簡稱「SAR」太接近，曾經竄改變成「SRS」，但係全世界冇人理佢，惟有繼續「SARS」落去，估唔到𠵱家真係有人在國際場合搞錯。
瓦努阿圖旅遊部長已經令阿董好冇癮，日本全國旅遊社協會主席二階俊博又好似「暗寸」佢。二階俊博話「沙士」最勁時，曾到訪北京，獲國家主席胡錦濤接見，胡錦濤好有信心咁話畀佢聽，沙士好快會搞掂，結果真係搞得掂，所以佢話第時同旅遊夥伴合作，最重要係睇領導人決策速度同能力。董特首，收到未？
（圖）瓦努阿圖旅遊部長Mahe叫錯阿董做沙士特首，在場聽眾都冇笑出聲。
傳真︰2623-9278
電郵︰