黃伊汶（Emme）日前在葵涌一個廢置的焚化場拍攝宣傳照，爬上十呎高木梯的Emme擺甫士騷44吋長腿，其後又伏在灼熱的電燈泡上，無懼毀容為新碟博到盡。
黃伊汶的最新唱片《黃伊汶》今日推出，宣傳照中她擺明大騷四十四吋長腿，性感誘人。日前Emme到葵涌一個已廢置的焚化場取景拍照，由於拍攝隊伍沒有向有關部門申請借用場地，所以當日拍攝時，不時被人驅趕。
由於場內沒有洗手間和更衣室，工作人員需臨時騰出一個地方給Emme換衫，Emme說：「換衫有地方，但就冇得去廁所，我同班工作人員都忍咗八個鐘。」
拍攝場地危險重重，但Emme仍非常百厭。她說：「嗰度樓底有幾層樓高，地下好多係爛地同埋有好多個窿，如果唔小心就好易跌倒。不過愈係要我唔好郁，我就愈好動。我着住高踭鞋都喺度跳，又爬嚟爬去，啲工作人員擔心我多啲。」
冇有怕的Emme坐在十呎高的木梯上拍照，下面則由三名大漢扶着，Emme說：「我重問佢哋使唔使再爬高啲㖭！」
攝影師又要求Emme伏在亮着的燈泡上，熱辣辣的燈泡差點令Emme毀容，她說：「嗰啲燈都着晒，好熱㗎！我又唔怕破相，塊面貼住啲燈，搞到我塊臉出晒紅點，咪當係新化妝囉！」
採訪：王連連
