如果唔係睇清楚個日曆，小初重以為時光倒流，回到97年或者2000年科網股時代，真係乜嘢股票都可以炒得一餐。喂！家陣好似係2003年喎，大家近排重鬧緊政府，又話經濟唔好，點知一有股票炒，就幾乎連阿媽都唔記得。
經紀黃話，股仔輪流炒，就快會翻炒大成生化（809），一來芬佬坐貨坐得多，要走唔容易，唯有炒高股價，以顯示自已夠眼光；二來隻股算落後，有追落後概念。有間歐資行嘅行家話，近期唔少中資股屢創新高，大成相比之下，實在升得唔多，可以炒落後。
小初話，大成近排並無特別新消息，只係話公司生產力上升，及有新產品推出之類。但經紀黃話，市旺炒股唔使問理由，佢見歐資行行家身體力行買咗唔少，所以跟住買番多少。
小初心諗，查實所謂大行智慧，可能有時同師奶嘅街頭智慧差唔得好遠。姑勿論點都好，小初會記住大成。隻股噚日收2.70元，微升0.94%。至於會否開車，相信稍後就見真章。
慕容小初